مکالمه حضرت زینب(س)
نه شوریدور کی بیله بیر بیره دییب لشکر
سبب ندور کی آت گزدورور جوان قاسم
قلنجن اوسته دوتوبدور علینون عباسی
آتام نشانه سی ماه مدینه عباسی
غضب لنیب نه سببدن مه بنی هاشم
دولبدور آت بلینه ایندی آلتی قارداشیم
«باجیم قورخما»
یارالانوب اورگیم قانه دوندی بوسوزدن
اماندو حسینی می دعواده قویمیون گوزدن
«سلام علیک»
گلور سسون،جان اکبریم، علیک السلام
شبیه حضرت پیغمبریم، علیک السلام
اولان تسلی قلب مکدر زینب
جمال مهر و مه انوریم علیک السلام
نه مطلبون وار ایا نوجوان لاله عذار
گتور بیانه گوروم دلبریم علیک السلام
«بلافاصله»
بیان قیل منه کیمدور بو آغلیانلار اُغول
«شفاعت ایچون»
باغیشلیوم نئجه ای حر نامدار سنی
کسوب قباغیمی چکدون بو کربلایه منی
باغشلیموم نئجه اول یولمی سن دوتدون
عیال شیر خدانی او چولده قورختدون
«گدرم»
مکدر اولما گلن ای شبیه پیغمبر
باغشلادم سنه حری جوان علی اکبر
«تنگ وتنگ»
سالدی فلک بلایه گینه آل حیدری
ایتدی دچار غملره بو دربدرلری
قورخورام حسینیم اوله قطع امید اولام
گورستمه ای خدا منه هرگز او گونلری
قارداش داغی یامان اولار هیچ باجی گورمسون
قاداشسیز اولسا باجی سنار بال وشهپری
«فغان باجی»
باجی چاغورما منی باجیسی اولن قارداش
آنام اولنده وئروبدور منی سنه قره باش
«فغان زینب»
شاه کشوریم قارداش یارویاوریم قارداش
زینبون ائوین یخما گئتمه حیدریم قارداش
«بو کناره»
من فدا بو گوزلروه یاندی جان بوسوزلروه
رحم ائله بوقیزلاروه گئتمه سروریم قارداش
«یانان زینب»
سوله بونه حالتدی زینبه قیامتدی
بوغمی نئجه چکسون اولسه اکبریم قارداش
«امان زینب»
یتیملری منه تاپشورما الامان قارداش
یتیم بویوتمیشم بیلمرم من کول باش
یتیم ائدر آتامین یاده گوز یاشین آخدور
یتیمون آغلاماقی خانمانلدری داغیدور
«انبیانی تام»
عزیزان وای زینب وای زینب
عزیزان آغلیون برحال زینب
نه یاخشی طالحیم وار غم توکنمز
اولر نورس جوانلار زینب اولمز
«اکبر ناکام»
مدیندن چخانی مین بلایه توش اولدوم
اوقدری اولمدیم،الله کفن فروش اولدوم
«کنیز آغلار»
دئمه بو سوزلری ای ماه پرضیا عباس
او بودلروه زینبون فدا عباس
باشیمدان ایندی جوانلار قراسین آچارام
سنون آدوا بو گون اورترم قرا عباس
«قانلی علم»
بو غملی قلبوه قربان جانیم اولیدی کاش
یقین اسیر اولاجاق بو چولده زینب کول باش
اگر گئدم وطنه تازدن قرا ساللام
یتیمه اوغلویی یاسونده یانیمه آللام